O subdelegado do Goberno en Ourense, Eladio Santos, e a xefa da Unidade de Violencia sobre a Muller, Alida Iglesias, presentaron esta mañá no IES Xermán Ancochea Quevedo da Pobra de Trives o libro «Vivas para contalo».
A publicación xorde da Comisión de seguimento das vítimas de violencia de xénero e foi editada pola Subdelegación do Goberno en Ourense.
Presentación en Trives do libro «Vivas para contalo»
O libro inclúe 13 microrrelatos de mulleres que sufriron violencia de xénero e sexual, ademais de 10 testemuños de profesionais que traballan con vítimas. A presentación realizouse dentro do Plan Director para a Convivencia e Mellora da Seguridade nos Centros Educativos e as súa contornas, iniciativa que promove a Garda Civil e a Policía Nacional para previr condutas delitivas como a violencia de xénero, o acoso escolar e o consumo de drogas.
Durante o acto, Eladio Santos subliñou a importancia da prevención a través da educación e destacou que existen oficinas específicas de atención ás vítimas. Ademais, insistiu en que as relacións deben basearse no respecto e que ningunha moza debe tolerar comportamentos violentos.
Tras a presentación, seis alumnos e alumnas do instituto leron varios testemuños do libro para sensibilizar ao estudantado sobre a realidade da violencia de xénero. Posteriormente, desenvolveuse un coloquio no que se abordaron dúbidas, desmontáronse mitos e fomentouse a reflexión sobre esta problemática social.