A Casa da Cultura de Sandiás acolleu o 30 de setembro unha nova actividade do Programa Rosalía, unha iniciativa que busca achegar formación, información e recursos ás mulleres do rural.
Baixo o título «Mulleres coñecendo os seus dereitos e recursos», a sesión estivo conducida por Laura Seara Sobrado, deputada no Parlamento, avogada e consultora.
Sandiás achega ás mulleres formación sobre os seus dereitos
O encontro permitiu ás participantes resolver dúbidas, compartir experiencias e coñecer recursos para reforzar a súa autonomía e capacidade de decisión.
A actividade incluíu un percorrido pola evolución dos dereitos das mulleres, con especial atención aos avances rexistrados en España e Galicia. As asistentes lembraron fitos como a legalización do divorcio e a despenalización do aborto, así como a Lei Orgánica 3/2007 para a igualdade efectiva de mulleres e homes.
O Programa Rosalía aborda tamén cuestións relacionadas coa igualdade, a saúde mental, a sexualidade e as reivindicacións sociais. A iniciativa pretende facilitar o acceso a formación de calidade no rural, evitando que as participantes teñan que desprazarse fóra do seu contorno.
Como peche do programa está prevista unha visita á empresa Aceites Abril, especialmente orientada ás mulleres en proceso de busca de emprego, co obxectivo de achegalas ao tecido empresarial e ás oportunidades laborais.