A Asociación de Produtores/as de Aceite e Aceituna de Galicia (APAAG) celebrou a súa asemblea xeral no Pazo de Salcedo de Pontevedra, sede da Misión Biolóxica de Galicia (CSIC), para aprobar contas, renovar cargos e marcar os retos de futuro dun sector en crecemento e aínda moi disgregado.
Durante a sesión formal, aprobáronse as actas e as contas anuais dos últimos tres exercicios, e abordouse o plan estratéxico da asociación.
O aceite galego busca consolidarse como produto de calidade
O presidente da APAAG, Alfonso R. Udías, reelixido no cargo, fixo unha diagnose do estado actual do sector en Galicia, sinalando que “a oliveira en Galicia é un sector moi pequeno e disgregado por distintas zonas, con resultados e rendementos diferentes. Isto multiplica os retos para estar agrupados, pero tamén fai necesaria unha ferramenta que conecte, acompañe e oriente aos produtores/as”.
Udías insistiu no papel clave da asociación como eixo vertebrador do sector: “Temos como obxectivo protexer e acompañar ao pequeno sector do aceite en Galicia, así como seguir a traballar na xestión das boas prácticas oliveirais que optimicen as plantacións das e dos asociados”.
Formación, divulgación e aposta pola orixe
APAAG destacou a súa intensa actividade formativa e divulgativa. A asociación organiza unha media de seis accións formativas propias ao ano e participa en diversas iniciativas que promoven os aceites galegos producidos baixo o selo apag.gal, que certifica a súa orixe 100% galega. Ademais, colabora con grupos operativos dedicados á recuperación das variedades autóctonas e á mellora do rendemento dos oliveirais.
Visita á Misión Biolóxica de Galicia
Unha das actividades máis destacadas da xornada foi a visita dos asociados e asociadas ás instalacións da Misión Biolóxica de Galicia, onde puideron coñecer de primeira man os traballos de reprodución das variedades autóctonas de oliveira. A visita foi guiada pola investigadora Carmen Martínez, xefa do grupo de viticultura, olivo e rosa do centro. “Foi unha experiencia moi interesante para todos os asistentes, e desde a APAAG queremos agradecerlle a súa acollida e labor”, subliñou o presidente da asociación.
Un sector emerxente con raíces
Fundada en 2014 e con sede en Ourense, a APAAG conta hoxe con arredor de 140 asociados. Segundo explicou Udías, as principais zonas produtoras son o sur de Lugo e Valdeorras, aínda que nos últimos anos se están recuperando áreas como Monterrei, Ribeira Sacra, Ribeiro, O Rosal ou a comarca do Deza.
A produción en Galicia aínda se basea, maioritariamente, en pequenas plantacións destinadas ao autoconsumo, pero comezan a aparecer produtores que comercializan Aceites de Oliva Virxe Extra galegos. Estes aceites, caracterizados por sabores singulares influídos polo clima atlántico, están a obter unha excelente acollida entre os consumidores.