A licitación pública en Ourense rexistrou unha caída do 46,85 % durante o primeiro semestre de 2026, segundo os datos da Federación Galega da Construción.
O sector advirte de que a provincia é a única de Galicia na que descende o investimento en obra pública e reclama unha maior planificación das administracións para corrixir este desequilibrio.
A licitación pública en Ourense cae un 46,8 % no primeiro semestre de 2026
Entre xaneiro e xuño, a licitación de obra pública en Galicia alcanzou os 998,97 millóns de euros. Esta cifra supón un 28,24 % máis que no mesmo período de 2025. Pola contra, en Ourense o volume licitado pasou de 89,23 millóns a 47,43 millóns de euros, o que supón un descenso de case a metade.
Un dos datos máis destacados corresponde á inversión da Xunta de Galicia. Mentres no conxunto da comunidade a licitación autonómica aumentou preto dun 90 %, en Ourense reduciuse un 69,44 %, ao pasar de 30,44 millóns a 9,30 millóns de euros. Tamén baixou a contratación da Administración do Estado, cun descenso do 34,99 %, ata situarse nos 11,51 millóns.
A situación resulta aínda máis acusada na contratación de servizos vinculados á construción. Neste apartado, Ourense pasou de 42,03 millóns de euros licitados no primeiro semestre de 2025 a só 1,49 millóns no mesmo período deste ano, unha redución do 96,45 %.
Chamada á reflexión
Desde o sector da construción trasladan estes datos como unha chamada á reflexión. Subliñan que, aínda que a licitación pública pode variar dun exercicio a outro pola execución de grandes proxectos, a magnitude do descenso en Ourense evidencia a necesidade de revisar a planificación dos investimentos.
Os empresarios defenden que a provincia debe recibir un volume de investimento acorde coas súas necesidades. Entre estas destacan as infraestruturas, vivenda, mobilidade, rehabilitación, servizos públicos e loita contra o despoboamento. Tamén lembran que a obra pública favorece a creación de emprego, impulsa a actividade das empresas locais e contribúe á cohesión territorial.
Por este motivo, solicitan ao Estado, á Xunta, á Deputación e aos concellos que reforcen a coordinación e elaboren unha planificación plurianual de investimentos para Ourense. Esta planificación debería contar con proxectos definidos e dotación orzamentaria suficiente. O sector asegura que as empresas ourensás contan coa capacidade necesaria para executar estas actuacións. Confían en que os próximos orzamentos permitan recuperar o peso da provincia no investimento público.