Máis dun milleiro de visitantes achegáronse o pasado sábado a Monterrei para gozar do festival Monterrei Reverdece, unha homenaxe á labor dos veciños e veciñas na defensa do territorio durante a vaga de lumes do verán, así como unha celebración das tradicións vencelladas á vendima.
A cita desenvolveuse o 4 de outubro en Albarellos, capital do concello, e concentrou nunha soa xornada un amplo programa de actividades.
Máis dun milleiro de persoas festexaron en Monterrei a súa Festa da Vendima
A primeira delas foi a IV Festa da Vendima de Monterrei, que quixo poñer en valor o traballo e o espírito comunitario arredor da recollida da uva, mantendo viva unha tradición moi arraigada na comarca.
A festa deu comezo ás 11:30 horas na finca A Cortiña, coa saída dun folión de carros tradicionais tirados por bois chegados de Chantada e cargados de uvas da finca experimental do Inorde. Á comitiva sumáronse os Gaiteros de Flariz, Trouleiros de Medeiros, Trebón do Mildeu, o Grupo de Danças e Cantares Regionais de Santo Estêvão (Chaves) e o Grupo Castro Floxo da Escola Provincial de Danza da Deputación de Ourense, que animaron as rúas con música e baile tradicional galego e portugués.
O pisado da uva
Ás 12:30 horas, na Alameda de Albarellos, realizouse o pisado tradicional da uva e abriuse o recinto feiral, onde o público puido degustar porco ao espeto, viños da Denominación de Orixe Monterrei e produtos locais. Participaron produtores como Sovoral apicultura orgánica, Sabia Mágica (Mel de Galicia IXP), Os Barbudos Cooperativa, Asubio, Queixos A Montaña, panaderías Álvarez e Germán, e Pucho Pulpeiro, entre outros. A xornada contou tamén con xogos tradicionais de Saudeter e un obradoiro de cianotipias a cargo de Peixesapop, dentro do programa de Artesanía de Galicia.
Que non falte a música
A música tivo un papel central coa actuación de A Roda e Coanhadeira, ás que seguiu a XL Xuntanza Internacional de Gaiteros, adiada dos lumes de agosto. Nesta edición rendeuse homenaxe á cantante Julia Bailón, e participaron recoñecidos artistas como Jean Pierre Van Hees (Bélxica), Hana Burešová (República Checa), Alfonso Fernández (Asturias), Juan Mari Beltrán (País Vasco), Alexander Suárez (Cuba), Nadia Vázquez (Galicia) e agrupacións como a Real Banda de Gaitas da Deputación de Ourense.
O broche final puxérono os Luar na Lubre, que ofreceron un concerto multitudinario e festivo, consolidando a Monterrei como referente da música e da cultura tradicional galega.