A poeta ourensá Rochi Nóvoa presentará o seu novo poemario Versos e lúas o venres 24 de outubro, ás 20:00 horas, na tenda OZOCOgz do Carballiño.
O acto contará coa participación da editora Vanessa Glemsel.
Rochi Nóvoa explora o mito galego en Versos e lúas
A obra, ilustrada polo artista Xosé Eladio, mergúllase na tradición oral e mitolóxica de Galicia a través da poesía.
Segundo explica a autora, “entre estas páxinas atoparedes versos que danzan coa maxia dos seres mitolóxicos galegos, esas figuras lendarias que habitan entre o soño e a historia, entre a realidade e o misterio”.
Versos e lúas é unha viaxe poética polas criaturas máxicas do imaxinario galego, unha homenaxe á natureza e ás lendas que conforman a identidade cultural do país. A presentación en O Carballiño forma parte do ciclo de actividades culturais que OZOCOgz promove arredor da creación literaria e artística feita en Galicia.