Os ximnastas do Club Ximnasia Pavillón Ourense (CXP), convocados pola selección nacional, tiveron unha destacada actuación no Campionato do Mundo por Idades de Trampolín, celebrado do 13 ao 16 de novembro no Navarra Arena de Pamplona.
A participación española pechouse con tres finais e un meritorio 5º posto, logros nos que o grupo ourensán tivo un papel notable.
Ximnastas do CXP brillan co combinado español no Mundial por Idades
A delegación española estivo formada por 68 deportistas, 10 deles pertencentes ao CXP, un dato que reflicte a confianza da Federación na canteira ourensá. Formaron parte da convocatoria: Fabio González Fernández, Breixo Miranda Fernández, Diego Rodríguez Pérez, Iker García Martínez, Mario Monteagudo Blanco, Daniel G. Imray Carrasco, Uxía Blanco Cidón, Claudia Blanco Cidón, Marta Rodríguez Cancio e Saúl Rodríguez Rodríguez.
As e os deportistas con menos experiencia afrontaron o desafío internacional con gran solvencia, destacando o 17º posto de Breixo Miranda Fernández en Trampolín, nunha categoría con 41 participantes.
No grupo máis experimentado, Saúl Rodríguez Rodríguez asinou unha das mellores actuacións españolas ao lograr o 5º posto en DMT, tamén entre 41 ximnastas. En sincronismo, Daniel G. Imray Carrasco acadou un 7º posto entre 36 parellas, mentres que Diego Rodríguez Pérez e Mario Monteagudo Blanco repetiron posición con outro 7º posto, esta vez nun cadro de 21 duplas.
No apartado feminino, Claudia Blanco Cidón completou unha sólida competición individual, situándose no 24º posto en Trampolín entre 70 participantes de todo o mundo.
Segundo informou a organización, esta edición reuniu 1.423 deportistas de 46 países, convertendo Pamplona no epicentro mundial da ximnasia trampolín durante catro días de intensa competición.