O PSdeG-PSOE de Laza saíu ao paso das recentes manifestacións do alcalde, José Ramón Barreal, despois de que a oposición presentase unha denuncia ante a Inspección Provincial de Traballo e a Seguridade Social.
Esta denuncia relaciónase cun posible fraude ao erario público e a incompatibilidade nas percepcións económicas que recibe o rexedor, quen tamén percibe unha pensión por incapacidade total permanente.
O voceiro do PSdeG-PSOE en Laza rexeita que a denuncia contra o alcalde sexa un ataque persoal
O voceiro do PSdeG-PSOE en Laza, Juan Ramón Álvarez Álvarez, explicou que a súa actuación como concelleiro se «limitou estritamente a cumprir» coas súas obrigas de supervisión e control, tal e como establece a lexislación vixente en administración pública.
Nese senso, o edil socialista subliñou que a comunicación trasladada ante os organismos competentes «non responde en ningún caso a ataques persoais«, senón ao deber institucional de velar pola legalidade, a transparencia e o uso adecuado dos recursos públicos.
«Rexeito rotundamente as afirmacións do rexedor que presentan estas actuacións como un conflito persoal«, afirmou Álvarez Álvarez. O voceiro tamén apuntou que o seu «deber como representante público é garantir que todas as situacións que poidan requirir unha revisión legal sexan trasladadas aos órganos competentes, sen prexuízos, sen animadversión e sen emitir xuízos públicos sobre ningunha persoa«.
Ademais, o representante socialista fixo fincapé en que o seu compromiso principal «continúa sendo o de traballar con responsabilidade, respecto e transparencia en beneficio de Laza e da súa veciñanza«.
As e os socialistas de Laza reafírmanse en que agora son os organismos competentes os que «deben determinar a existencia ou non de irregularidades» e subliñan que este tipo de procedementos «son habituais e forman parte do funcionamento democrático de calquera administración«.