O Judo ourensano brillou con forza na Gala anual da Real Federación Española de Judo e Deportes Asociados, celebrada o sábado 22 de novembro no Auditorio Pablo Goyeneche do Comité Olímpico Español (Madrid).
No evento, conducido tras un emotivo discurso do presidente do COE, o ourensán Alejandro Blanco, recoñeceuse o labor de deportistas e mestres de todo o país, cun papel protagonista para o Gimnasio Marbel.
Ourense destaca na Gala do Judo Español con tres mestres premiados
O Mestre Manuel Montero, 8º Dan e referencia internacional na investigación sobre artes marciais, recibiu o Premio da Federación á Investigación sobre Judo e Deportes Asociados.
O xurado valorou o seu papel como historiador, a súa colaboración na obra considerada “a Biblia do Judo”, A esencia do Judo, xunto ao mestre Shu Taira, e o seu amplo legado documental sobre este deporte. Montero, que está próximo aos 80 anos, continúa coa súa actividade docente no Judo Club Marbel. Alí mantén vivo un dos maiores arquivos de datos sobre Judo desde 1947 e Jiu Jitsu desde 1907.
Tamén houbo recoñecementos para outros dous mestres ourensanos do Marbel. Felipe Iglesias acadou o Cinturón Negro 5º Dan de Judo, mentres que Anita Fernández Moráis foi distinguida co 4º Dan. Ambos desenvolven unha intensa labor formativa, tanto no propio centro como nas diversas escolas da provincia.
A nivel galego, premiáronse outros cinco deportistas e mestres:
- Laura Martínez Abelenda, Bronce Mundial Absoluto 2025, levou o premio á Mellor Judoka Feminina.
- Alejandro Álvarez e David Pardavila Martínez recibiron a Medalla de Ouro ao Mérito Deportivo en Jiu Jitsu.
- Andrés Senín foi distinguido co Cinturón Branco-Vermello 7º Dan de Judo.
- Marcos Bermúdez, co Cinturón Negro 6º Dan en Defensa Persoal.