A Executiva Provincial do PSdeG-PSOE de Ourense reunirase este martes de urxencia para abordar a denuncia por presunto acoso laboral presentada contra o alcalde de Barbadás e deputado provincial, Xosé Carlos Valcárcel Doval.
Segundo informa o propio partido, o secretario provincial do PSdeG-PSOE de Ourense, Álvaro Vila Araújo, convocou a reunión logo de ter coñecemento da denuncia rexistrada a través da canle interna da organización.
O PSdeG-PSOE de Ourense analiza unha denuncia por presunto acoso laboral
A dirección provincial asegura que actuará con celeridade e rigor, aplicando de maneira estrita os procedementos e protocolos internos establecidos polo partido para este tipo de situacións.
Debido á delicadeza do asunto, a xuntanza celebrarase a porta pechada. Durante a reunión, a Executiva Provincial analizará as circunstancias do caso e adoptará as decisións que correspondan conforme ao regulamento interno do PSdeG-PSOE, sempre co obxectivo de garantir a integridade do proceso e os dereitos das persoas implicadas.
Desde a organización socialista subliñan que o respecto escrupuloso aos procedementos resulta esencial, polo que a dirección provincial decidiu pospoñer calquera valoración pública ata a finalización da reunión. O PSdeG-PSOE de Ourense reitera, así mesmo, o seu compromiso coa defensa das vítimas e coa aplicación rigorosa dos mecanismos previstos para estes casos.
Unha vez rematada a Executiva Provincial e analizados os feitos, o partido comunicará as resolucións adoptadas. As medidas acordadas daranse a coñecer nunha rolda de prensa que se celebrará mañá, 17 de decembro, na sede do PSdeG-PSOE de Ourense, a partir das 10:30 horas, na que o secretario provincial atenderá ás preguntas dos medios de comunicación.
2 comentarios