O Club Athlos continúa na zona alta da Liga Nacional Primeira Ouro de bádminton 2026 tras a xornada disputada esta fin de semana na cidade da Coruña.
Na mesma, o conxunto ourensán sumou unha vitoria e dúas derrotas que lle permiten conservar a 4ª posición na clasificación.
O Club Athlos consolídase no cuarto posto da Liga Nacional Primeira Ouro
A competición arrancou o sábado ás 11:00 h, cun encontro moi igualado entre o CB Athlos e o CER Vigo. Finalmente, o encontro decidiuse por un axustado 3-4 a favor do conxunto vigués.
Xa pola tarde, ás 16:15 h, o equipo ourensán reaccionou cun importante triunfo fronte ao Club del Mar, ao que superou por 4-3.
A xornada completouse o domingo ás 9:30 h, cando o Athlos se enfrontou ao CB Arjonilla, un dos equipos máis fortes da categoría. O encontro rematou cun resultado de 2-5 favorable ao cadro andaluz.
Con estes marcadores, o Club Athlos mantense na cuarta posición da clasificación, consolidado na zona media-alta da liga. Demostra deste xeito a súa competitividade nunha das categorías máis esixentes do bádminton nacional.
Ademais, o conxunto ourensán conta actualmente con tres xogadores situados no Top 10 dos mellores deportistas da liga. Este dato reflicte o bo momento deportivo da entidade.
Próxima xornada en Granollers
A seguinte xornada da Liga Nacional Primeira Ouro disputarase os días 18 e 19 de abril en Granollers (Barcelona). Nesa cita, o CB Athlos medirase a tres rivais: CB As Neves, CB Granollers e CD Huelva, nunha nova oportunidade para sumar puntos e seguir loitando polos postos de privilexio da clasificación.