A asociación cultural ourensá Better Things abrirá a súa nova tempada de concertos cunha actuación de The Speedways, banda londiniense de power pop que ofrecerá en Ourense a súa única data en Galicia.
O concerto terá lugar o venres 25 de setembro, ás 21:00 h, no Café Cultural Auriense.
The Speedways actuarán en Ourense na súa única data en Galicia
As entradas teñen un prezo de 15 euros en venda anticipada e 18 euros en billeteira, e poderán adquirirse en Rock Club e Auriense.
The Speedways regresan á escena con novo material que presentarán durante a súa xira de setembro de 2026. A banda británica acaba de publicar Triple Platinum, unha recompilación dos seus tres primeiros álbums que inclúe tamén novas gravacións de temas do seu disco de debut.
Co seu característico son, definido como «Ronettes-Punk», o grupo consolidouse como unha das referencias do power pop británico contemporáneo. Ao longo da súa traxectoria actuou en festivais como Funtastic Dracula Carnival, Purple Weekend e Luna Fest, ademais de participar en concertos de Radio 3 e esgotar entradas en diferentes cidades de España, Europa e Estados Unidos.
A cita organizada por Better Things permitirá así ver en directo en Ourense unha das bandas máis destacadas do power pop británico, nunha actuación que será a súa única parada en Galicia nesta xira.