O Club Ximnasia Pavillón acadou un destacado 5º posto na I Fase da Copa de España de Conxuntos, celebrada en Granada entre o 1 e o 4 de maio, grazas á brillante actuación do seu conxunto infantil absoluto.
A cita nacional reuniu a numerosos clubs de todo o Estado nas modalidades base e absoluta.
O Club Ximnasia Pavillón brilla en Granada co 5º posto infantil
As ourensás participaron con catro conxuntos, dous de nivel base e dous de nivel absoluto, deixando claro o bo traballo que se realiza desde a canteira do club.
O debut foi o mércores 1 de maio co conxunto cadete base (Mónica, Laura, Daniela, Noa, Nicole e Lara). A pesar dalgúns desaxustes no exercicio, as ximnastas demostraron carácter e conseguiron o posto 43 da clasificación xeral.
O venres 2, as alevíns base (Martina, Mara, Valeria V., Sabela, Alicia e Valeria R.) realizaron un exercicio potente e ben executado que lles valeu un meritorio posto 23 da súa categoría.
O mellor resultado chegou o domingo da man do conxunto infantil absoluto (Claudia, Carla, Lara, Olga e Bianca), que asinou a súa mellor actuación da tempada. Cunha coreografía limpa e chea de seguridade, quedaron no 5º posto, a tan só medio punto da medalla de prata.
Tamén o domingo competiron as senior absolutas (Candela, Mariña, Noa, Claudia e Laura). As ximnastas mostraron a súa experiencia e capacidade de reacción para resolver os erros e rematar no posto 21 da categoría máis esixente da competición.
O Club Ximnasia Pavillón xa prepara a súa próxima cita. En dúas semanas competirán en Vigo, onde os conxuntos senior e infantil, xunto ao conxunto senior de primeiro ano, xogaranse o pase á II Fase da Copa de España e á clasificación nacional de clubes na modalidade individual. Nesa mesma xornada, José e Eduardo buscarán o billete para o Nacional Absoluto Masculino, engadindo máis emoción á presenza ourensá na elite da ximnasia rítmica.