Amodo Tenda inaugurará o vindeiro 8 de maio a exposición “Entre formas”, un novo proxecto artístico da ilustradora Laura Tova, que poderá visitarse na Sala Invisible do espazo situado na rúa Santo Domingo, 34, en Ourense.
A apertura oficial terá lugar ás 19:00 h e contará coa presenza da propia autora.
Amodo Tenda inaugura en Ourense a mostra “Entre formas” de Laura Tova
A mostra, titulada “Entre formas”, propón ao público unha viaxe visual construída desde o xogo e a improvisación, nun universo onde conviven elementos orgánicos e xeométricos, o caos e a estrutura, así como o recoñecible e o inesperado.
A través das súas pezas, a artista crea composicións nas que as formas parecen familiares, aínda que nunca son exactamente o que aparentan.
O traballo de Laura Tova destaca por poñer en valor o cotián, a natureza e a alegría, transformando ideas en historias visuais que conectan co espectador desde unha perspectiva sensible e intuitiva.
Formada na Escola de Arte e Superior de Deseño Pablo Picasso, onde se graduou en 2014, participou ao longo da súa traxectoria en proxectos de ilustración publicitaria, editorial e aplicada a produto, ademais da creación de carteis, publicacións e obradoiros.