Vilar de Barrio celebrará os días 9, 10 e 11 de outubro a 47ª Festa da Pataca.
Esta cita gastronómica e cultural ofrecerá durante tres xornadas música, xogos populares, degustacións e actividades para todos os públicos.
Vilar de Barrio celebra a 47ª Festa da Pataca
A programación comezará o venres 9 de outubro coa feira durante toda a mañá. Pola tarde haberá xogos populares, un xacobeo de veteráns con Pepo Suevos e Dani Dopazo e cantos de taberna. A xornada rematará coa Pataca Fest, con Tapa D’Orella ás 23:00 h e sesión de Gramola con Kike Varela desde a medianoite.
O sábado 10 incluirá showcookings e degustacións, música tradicional con Xeitosiñ@s, xogos populares, relatorios e a actuación de Sons do Río, grupo de concertinas de Montalegre (Portugal). Pola noite terá lugar a proposta gastronómica “A noite dos ovos fritidos con patacas e chourizo asado”, por 6 euros por persoa, seguida da actuación de Sés ás 22:30 h.
O domingo 11 concentrará boa parte dos actos tradicionais. A mañá comezará coa actuación das Rufas de Balteiro, seguida do desfile “O rural e a pataca”, coa Banda de Gaitas de A Peniña. Ás 12:30 h celebrarase o acto institucional e pregón da 47ª edición.
A programación continuará cun xantar popular, con empanada e costelar de becerro ao espeto, por 20 euros por persoa. Pola tarde haberá novos showcookings, xogos populares, foliadas e a actuación de Bandiños Band, antes da entrega de premios ás 19:30 h.