A programación de Primavera Republicana 2026 continúa este martes, 19 de maio, coa presentación do libro Entre hienas, da escritora Loreto Urraca.
O acto terá lugar ás 19:30 h na Biblioteca Pública de Ourense.
Loreto Urraca presenta Entre hienas na Primavera Republicana de Ourense
A autora estará presente nun encontro co público no que afondará no proceso de investigación que deu forma a esta obra. Contará ademais coa colaboración musical de Félix e Castor Castro Vicente.
A publicación constitúe unha profunda investigación biográfica construída a partir de documentos, cartas e diarios inéditos, na que Loreto Urraca reconstrúe a historia do seu avó, Pedro Urraca Rendueles, unha figura pouco coñecida ligada á represión do franquismo e á colaboración internacional durante a Segunda Guerra Mundial.
Ao longo das páxinas de Entre hienas, a autora revela a relación entre sectores franquistas, o réxime nazi e a policía da Francia de Vichy. Segue o rastro dun policía que foi condenado a morte en ausencia en Francia no ano 1948 por colaboración co inimigo durante a ocupación. Tras a súa fuxida a Bélxica, Pedro Urraca continuou traballando para o Estado español ata 1982.
O acto, organizado por Amigos da República dentro da programación cultural de Primavera Republicana, ofrecerá ao público ourensán a oportunidade de coñecer de primeira man unha investigación que rescata episodios pouco explorados da memoria histórica europea e española.