A ximnasta ourensá Paula Touza proclamouse campioa de España Élite Absoluta de Trampolín, a modalidade olímpica da disciplina, no Campionato de España celebrado en Valladolid.
O club completou unha actuación sobresaliente coa conquista do título nacional por equipos en Dobre Minitramp feminino absoluto e co subcampionato de Marta López nesta mesma especialidade.
Paula Touza lidera os éxitos do Ximnasia Burgas na elite nacional
Estes resultados chegan apenas uns días despois dos grandes éxitos acadados polo club no Nacional Base, disputado os días 3 e 4 de xuño. Nesa cita, o Ximnasia Burgas sumou 15 podios, seis deles medallas de ouro.
Na competición absoluta de trampolín, Paula Touza logrou o título na máxima categoría nacional, superando a rivais de gran nivel e situándose por diante de Noemí Romero, integrante da selección española que participou nos últimos Xogos Olímpicos.
O club ourensán tamén brillou na modalidade de Dobre Minitramp, onde o equipo feminino conquistou o Campionato de España Absoluto. Pola súa parte, Marta López conseguiu a medalla de prata individual na categoría absoluta.
Estes éxitos cobran aínda máis relevancia ao producirse nun momento no que a campioa do mundo Melania Rodríguez continúa recuperándose da lesión sufrida durante o pasado Campionato de Europa, o que evidencia a profundidade da canteira e o elevado nivel competitivo da entidade ourensá.
A actuación do club completouse coa destacada participación de Iker García, que se proclamou campión de España Élite Prejunior de Trampolín. Ademais, o ximnasta sumou unha medalla de bronce en Dobre Minitramp Élite sub-15 formando parte do equipo do Ximnasia Pontevedra.
Con estes resultados, o Ximnasia Burgas consolídase entre os clubs de referencia do trampolín español, tanto nas categorías de base como na máxima competición nacional.