O Partido Popular de Ourense iniciou a campaña das eleccións xerais do 29 de novembro coa tradicional pegada de carteis no parque de San Lázaro.
O acto estivo encabezado polo presidente provincial, Luis Menor, e pola cabeza de lista ao Congreso, Ana Belén Vázquez, que chamaron á mobilización para apoiar a candidatura de Alberto Núñez Feijóo.
O PP de Ourense pide o voto para Feijóo no inicio da campaña
Menor pediu traballar «por cada voto» para impulsar un cambio no Goberno de España e situar as necesidades da provincia entre as prioridades políticas. O dirixente popular reivindicou a traxectoria de Feijóo, lembrando as súas catro maiorías absolutas e os trece anos á fronte da Xunta.
O presidente provincial tamén criticou o que cualificou como anos de abandono do Goberno de Pedro Sánchez e reclamou avances nas comunicacións, mellores servizos para o tecido empresarial, máis seguridade no rural e unha atención directa á cidadanía.
Pola súa banda, Ana Belén Vázquez pediu o apoio dos ourensáns para que a provincia teña representación nas decisións do próximo Executivo. «Pido o voto para que Ourense teña voz, forza e capacidade de decisión nun Goberno presidido por Feijóo«, afirmou.
A candidatura popular ao Congreso está encabezada por Vázquez, mentres que Miguel Santalices lidera a lista ao Senado. Menor pechou o acto cunha chamada á participación durante as dúas semanas de campaña: «Acabouse a función. O 29-N empeza a xestión«.