O PSdeG insta ao goberno municipal do Concello de Ourense a solicitar a inexecución da sentenza sobre a Praza de San Antonio.
A concelleira socialista no Concello de Ourense, María Fernández, pediu que se prepare unha execución parcial que permita recuperar a titularidade do espazo baixo a praza.
O PSdeG insta ao Concello a solicitar a inexecución da sentenza sobre a Praza San Antonio
Esta acción tería o obxectivo de evitar que as eventuais indemnizacións supoñan unha hipoteca a longo prazo para a Administración local.
Fernández lembrou que esta foi a solución adoptada no seu día polo executivo socialista, permitindo salvar as edificacións da praza e evitando indemnizacións millonarias. Neste sentido, esixiu ao alcalde Gonzalo Pérez Jacome que pida desculpas ao goberno socialista anterior e, en particular, á exconcelleira de Urbanismo, Áurea Soto. Segundo afirmou, Soto actuou con responsabilidade priorizando o interese público e evitando o desaloxo das vivendas legalizadas en 2007.
Dende xuño de 2024, tras o rexeitamento do último recurso pendente sobre o conflito urbanístico por parte do Tribunal Superior de Xustiza de Galicia (TSXG), o goberno municipal tivo tempo para avaliar solucións, pero, segundo os socialistas, preferiu dedicarse a buscar culpables en lugar de actuar. O PSdeG suxeriu que, se o Concello non é capaz de asumir as súa responsabilidades, debería delegar as competencias en materia urbanística para que sexan eles quen as xestionen.
A solución, segundo os socialistas, require compromiso e traballo. Por unha banda, é necesario recuperar os locais adquiridos pola Seguridade Social, que non poden ser edificados e polos que se debe indemnizar con case seis millóns de euros. Por outra, o Concello debe cumprir co prazo de dous meses para cesar a actividade no aparcadoiro e proceder ao seu desaloxo.
Desde o PSdeG destacaron que o conflito urbanístico da Praza San Antonio vén de lonxe, especialmente desde os anos 90, marcados pola especulación inmobiliaria. Insisten en que os gobernos socialistas, especialmente desde 2007, buscaron solucións sen procurar culpables. Pola contra, acusan a Democracia Ourensana de inacción e de primar o beneficio político sobre o interese veciñal.
Os socialistas aseguran que a solución pasa por repetir a estratexia adoptada pola exconcelleira de Urbanismo, solicitando a inexecución da sentenza. «Este era o camiño correcto desde o primeiro pronunciamento xudicial. Agora, con Gonzalo Pérez Jacome na alcaldía, vese obrigado a asumir que a vía axeitada é salvar o xa feito para evitar danos irreparables, tanto a nivel económico como social», concluíron.