O subdelegado do Goberno en Ourense, Eladio Santos, destacou esta mañá que a especialización das unidades da Garda Civil é “un piar imprescindible” para garantir respostas eficaces ante situacións complexas.
Fíxoo no marco dun exercicio dinámico organizado pola Comandancia de Ourense no centro comercial Carrefour de Barbadás, que simulou unha ameaza terrorista.
Ourense acolle un simulacro antiterrorista con ampla participación
O simulacro, de gran realismo e valor operativo, contou coa participación de múltiples unidades especializadas da Garda Civil:
- Agrupación de Tráfico,
- Seguridade Cidadá,
- USECIC,
- GEDEX,
- UCE (detector de explosivos),
- Unidade Aérea,
- GRS nº7,
- UOPJ e o
- Grupo de Información da Comandancia (GIC).
- Tamén se implicaron a Policía Local de Barbadás, Urxencias Sanitarias de Galicia-061, médicos forenses e autoridades xudiciais.
Durante o exercicio, que simulou un ataque perpetrado por tres individuos armados con armas de fogo e armas brancas, púxose a proba a capacidade de resposta e coordinación dos corpos de seguridade e emerxencia.
“Hoxe asistimos a un exercicio de enorme valor operativo e simbólico, que pon de manifesto o compromiso das nosas institucións coa seguridade e a preparación ante situacións de risco real”, sinalou Eladio Santos tras presenciar a simulación.
O subdelegado salientou que “tan importante como a especialización é a coordinación”. Recalcou que só coa colaboración fluída e planificada entre as distintas unidades da Garda Civil, e entre os diferentes corpos de seguridade e servizos de emerxencia, é posible afrontar con eficacia ameazas graves como as de carácter terrorista.
Santos felicitou o tenente coronel xefe da Garda Civil de Ourense, Rafael Berguillo, pola excelente organización do simulacro. “A Comandancia de Ourense demostra unha vez máis a súa profesionalidade e compromiso coa cidadanía, protexendo 91 concellos da provincia”, afirmou.
Finalmente, agradeceu a colaboración da Policía Local de Barbadás, das autoridades xudiciais e dos equipos de Urxencias Sanitarias de Galicia-061. “A súa participación foi indispensable para dar realismo e eficacia ao exercicio, demostrando que a seguridade é unha tarefa colectiva”, concluíu.