O subdelegado do Goberno en Ourense, Eladio Santos, participou hoxe nun simulacro de incendio forestal con situación 2, deseñado para reforzar a resposta fronte ás emerxencias e mellorar a coordinación entre administracións.
O Concello de Ourense acolleu este martes un simulacro de incendio forestal con activación da situación 2. Esta é unha das máis graves previstas no Plan de Emerxencias por Incendios Forestais de Galicia (PEIFOGA).
Simulacro de incendio forestal con situación 2 en Ourense
O obxectivo foi avaliar a capacidade de resposta dos distintos corpos e administracións fronte a un escenario extremo, como o dun lume con ameaza directa á poboación.
Eladio Santos seguiu o desenvolvemento do exercicio desde o Centro de Coordinación Operativa (CECOP), situado no edificio do ISSGA. O subdelegado destacou que o Goberno central “pon á disposición da Xunta todos os recursos necesarios” para combater os incendios. Xunto a el estiveron o director xeral de Emerxencias e Interior, Santiago Villanueva; o delegado territorial da Xunta, Manuel Pardo; a xefa de Protección Civil da Subdelegación do Goberno, Mari Carmen Lodos; persoal do Concello e membros das Forzas e Corpos de Seguridade do Estado.
O simulacro reproducía un escenario de lumes simultáneos nos núcleos de Naves e Canibelos. Esta situación require a intervención inmediata dos servizos de protección civil e evacuación da poboación. Segundo lembrou Santos, na última década activouse a situación 2 en 38 incendios na provincia de Ourense. Tiveron especial gravidade nos anos 2016 e 2017, nos que se rexistraron dez casos cada ano afectando a dez concellos.
Na súa intervención, Eladio Santos puxo de manifesto a relevancia deste tipo de adestramentos. Tamén subliñou que o Goberno central participa activamente cada ano na campaña de prevención e loita contra o lume. “Ourense sofre con especial dureza os incendios forestais, que representan un grave problema medioambiental”, apuntou.
Datos a ter en conta
Os datos ofrecidos polo subdelegado confirman esta realidade: entre 2015 e 2024 rexistráronse 6.618 lumes forestais na provincia e queimáronse máis de 102.000 hectáreas, o que supón o 55% da superficie calcinada en Galicia durante esa década.
Por último, Santos asegurou que o Estado activará sempre que sexa necesario todos os seus medios dispoñibles —Garda Civil, Policía Nacional, Protección Civil e Exército— para apoiar os recursos da Xunta, administración con competencias nesta materia.