O alcalde de Ourense, Gonzalo Pérez Jácome, e o concelleiro de Obras Públicas, Servizos Urbanos, Medio Ambiente e Urbanismo, Francisco Lorenzo, recibiron esta mañá na Casa Consistorial á nova directiva da Federación de Asociacións Veciñais Limiar, recentemente elixida.
O encontro serviu como presentación oficial e primeiro contacto institucional para abordar asuntos que preocupan á cidadanía.
A nova directiva de Limiar reúnese co alcalde de Ourense
A federación, que agrupa 44 asociacións veciñais, estará presidida por José Luis Lorenzo Blanco, acompañado por Juan Carlos Ferreiro Iglesias como vicepresidente, Eliseo González González como secretario, Senén Rodríguez Vázquez como tesoureiro, e os vogais Alfonso Pazos Cid, María Milagros Sierra Gómez e María Milagros Fernández Fernández.
Durante a reunión, o presidente destacou a vontade de colaboración co Concello: “Queremos mellorar moitas cousas e colaborar co alcalde ao máximo, porque somos os que coñecemos o que necesita cada veciño”. Engadiu ademais que a federación reúne persoas de diferentes ámbitos —“labregos, carpinteiros, médicos, avogados… xente valiosa”— e que esa diversidade debe servir para avanzar en melloras nos barrios e zonas residenciais da cidade.
A cita abre unha nova etapa de diálogo entre o goberno municipal e as asociacións veciñais, cun obxectivo compartido: reforzar a participación cidadá e mellorar a calidade de vida en Ourense.