O Concello de Ourense sumouse esta mañá á conmemoración do Día Internacional contra a Explotación Sexual e a Trata de Mulleres, Nenas e Nenos cun acto institucional no salón de plenos.
A concelleira de Igualdade, Noa Rouco, deu lectura á declaración aprobada pola Federación Española de Municipios e Provincias, á que a cidade se adheriu.
Ourense reafirma o seu compromiso contra a explotación sexual
Rouco lembrou que esta xornada obriga a sociedade a reforzar o compromiso contra unha das maiores vulneracións dos dereitos humanos, subliñando que tanto a trata con fins de explotación sexual como a industria do sexo “son realidades inaceptables que atentan contra a liberdade, a seguridade e a igualdade”.
A edil puxo sobre a mesa datos preocupantes: segundo o Ministerio do Interior, en 2024 identificáronse 632 vítimas de trata en España, das que 376 sufriron explotación sexual. Entre elas figuraban 15 nenas e 1 neno, e o 98% eran mulleres, o que revela o marcado carácter de xénero desta violencia.
No peche do acto, Rouco destacou a firmeza do Concello: “Hoxe, 23 de setembro, expresamos o noso rexeitamento decidido á trata e á explotación sexual e renovamos o compromiso de construír municipios seguros, inclusivos e libres de violencia. Cada paso nesta dirección é unha aposta por un futuro máis digno, no que ningunha muller, nena ou neno sexa tratado como mercadoría”.
