O alcalde de Ourense, Gonzalo Pérez Jácome, manifestou esta mañá a súa preocupación pola escaseza de taxis en horas punta na cidade.
Este problema intensificouse coa chegada do AVE. “É un problema, e como servizo público, temos que solucionalo”, afirmou o rexedor.
A falta de taxis en Ourense preocupa ao Concello tras a chegada do AVE
Actualmente, Ourense conta con 106 licenzas de taxis, unha cifra considerada adecuada para a poboación da cidade segundo a normativa autonómica, que establece unha licenza por cada mil habitantes.
Con todo, o Concello detectou que arredor de 19 destas licenzas non están sendo explotadas como taxis, senón que se utilizan de facto como VTC (vehículos de transporte con condutor) para servizos privados.
Ante esta situación, o Concello abrirá un expediente informativo para investigar estes casos, que poderían derivar na retirada da licenza aos taxistas que a usen de forma fraudulenta. “É un feito grave, xa que se un 20% dos taxistas non fai o seu labor, a cidade nótao. Ademais, eses taxistas que non cumpren coas súas obrigas, fan dano aos outros 87 que si o fan”, explicou Pérez Jácome.
A problemática complícase coa situación en Barbadás, concello limítrofe con Ourense, onde tamén se detectan casos similares. Como consecuencia, os 87 taxistas de Ourense non só teñen que cubrir a demanda da súa cidade, senón tamén atender a poboación de Barbadás, que supera os 10.000 habitantes, segundo alertou o alcalde.