A agrupación municipal do PSdeG-PSOE de Ourense celebra este venres o seu tradicional magosto popular no Campo da Feira.
Esta é unha actividade aberta a toda a cidadanía que desexe participar.
Magosto popular do PSdeG-PSOE de Ourense no Campo da Feira
O evento, organizado pola Comisión Executiva Municipal, forma parte das accións impulsadas polo partido ao longo do ano para achegar a veciñanza á vida social e cultural da cidade, ademais de manter vivas as tradicións ourensás.
A cita gastronómica comezará a partir das 20:00 horas, nas inmediacións das instalacións de bombeiros, e contará con actuación musical en directo para amenizar a velada.
O menú, de prezo popular (5 euros), inclúe costela de porco, empanada, chourizos, castañas, bica, bebidas e café. Ademais, as nenas e nenos menores de 10 anos poderán asistir de balde, fomentando así o carácter familiar e participativo do encontro.
As entradas poden adquirirse ata o xoves ás 14:00 horas na sede do partido, situada na rúa Ribeira de Canedo. Tamén están dispoñibles na oficina do grupo municipal socialista, na rúa da Barreira.
Desde o PSdeG-PSOE de Ourense destacan que este tipo de iniciativas buscan recoñecer o valor das festas populares galegas. O magosto, sinalan, é unha das tradicións máis arraigadas en Ourense, e representa un momento de encontro, amizade e celebración da cultura local.