O delegado territorial da Xunta de Galicia en Ourense, Manuel Pardo, visitou esta mañá a zona da avenida de Pardo de Cela para supervisar o remate das obras incluídas na actuación conxunta da nova senda do Barbaña.
Acompañado de técnicos da Axencia Galega de Infraestruturas, destacou a relevancia desta intervención.
A Xunta remata as obras da senda do Barbaña en Ourense
Pardo explicou que as obras executadas neste punto adquiren unha especial importancia ao tratarse dunha das principais vías de acceso e saída de Ourense.
Ademais, lembrou que neste enclave transcorre o Camiño de Santiago na súa ruta da Vía da Prata. Por este motivo, a intervención converte a contorna nun espazo de interese tanto para peregrinos como para visitantes, ao atoparse nas inmediacións da Ponte Vella, declarada Ben de Interese Cultural.
O obxectivo principal da actuación foi mellorar a seguridade viaria e peonil mediante a creación dunha ampla superficie que facilita os cruces en múltiples direccións. Para iso, coordináronse os semáforos situados nas proximidades do Pavillón dos Remedios e do Colexio Salesianos. Instalouse sinalización podotáctil e completouse o marcado viario e horizontal en zonas de cambio de rasante e paso de peóns.
Segundo explicou o representante autonómico, a senda do Barbaña terá unha lonxitude total de 4 quilómetros unha vez completada. Conectará puntos estratéxicos como a avenida das Caldas, a Ponte Romana, o paseo do Barbaña, Expourense e o Pazo dos Deportes Paco Paz, configurando un eixo norte-sur que fomentará a mobilidade sostible na cidade.
Durante a visita, Manuel Pardo destacou que esta intervención exemplifica o compromiso da Xunta coa creación de contornas urbanas máis accesibles e seguras. “Trátase dun modelo de cidade pensado para conectar equipamentos públicos como estacións intermodais, hospitais e centros administrativos, ofrecendo alternativas reais ao uso do vehículo privado”, sinalou.