O Club Ximnasia Pavillón leva a súa canteira ao Campionato do Mundo por Idades de Trampolín, que se celebra desde hoxe e ata o 16 de novembro no Navarra Arena de Pamplona.
A cita internacional chega tras o recente Campionato do Mundo Absoluto, que deixou excelentes resultados para a delegación española.
Dez ximnastas do Club Pavillón compiten no Mundial por Idades
A Real Federación Española de Ximnasia convocou a dez deportistas ourensáns para representar a España nesta competición: Fabio González Fernández, Breixo Miranda Fernández, Diego Rodríguez Pérez, Iker García Martínez, Mario Monteagudo Blanco, Daniel G. Imray Carrasco, Uxía Blanco Cidón, Claudia Blanco Cidón, Marta Rodríguez Cancio e Saúl Rodríguez Rodríguez.
O grupo viaxou o luns acompañado do seu adestrador, Néstor González Pérez, e este martes xa realizou a súa primeira toma de contacto co pavillón navarro.
Para a maioría dos ximnastas, esta será a súa primeira experiencia nun campionato do mundo, un paso decisivo na súa traxectoria deportiva. “Seguro que os máis veteranos saberán acompañalos nesta experiencia”, destacan desde o club, que amosa o seu orgullo por esta nova representación internacional.