A Asociación Amigos do Patrimonio de Toén inaugurará o domingo 23 de novembro, ás 12:00 h, un panel interpretativo sobre as barcas e portos históricos do Miño, un contido esencial para comprender a evolución social, económica e cultural do municipio.
A presentación terá lugar na antiga escola de Puga, coa colaboración do Concello de Toén.
Toén recupera a memoria das barcas e portos do Miño
O novo panel destaca a relevancia dos pasos fluviais, documentados desde o século IX, e lembra enclaves emblemáticos como a barca de Feá. Este actuou como punto estratéxico nas comunicacións locais.
Ese paso foi escenario de feitos históricos, entre eles a presenza das tropas francesas durante a Guerra de Independencia. A inauguración contará ademais co testemuño dun dos últimos barqueiros vivos, quen levou a barca do Porto de Quellepán ata o ano 1971.
A iniciativa forma parte do proxecto “Lugares con Historia”, que esta mesma semana incorporou outro panel na aldea de Toén sobre o achado, e posterior desaparición, do Brazalete de Ouro de Toén, unha peza do Bronce Final. Nos próximos meses tamén se instalarán novos paneis en Mugares e Moreiras, ampliando así a difusión do patrimonio local.
