Antiq Auria pecha a súa novena edición como unha das citas referenciais do Norte de España e Portugal, tras recibir ao longo da fin de semana preto de 3.000 visitantes, unha cifra que supera os datos das últimas edicións.
O medio cento de expositores chegados de cinco países valoraron moi positivamente esta nova convocatoria celebrada en Expourense.
Antiq Auria pecha cun récord de visitantes e consolídase no Norte
A xornada do domingo foi a máis concorrida e volveu demostrar o tirón desta feira internacional de antigüidades entre coleccionistas, curiosos e afeccionados.
Un dos momentos con maior afluencia foi, como é habitual, a gran poxa celebrada ás 12.00 horas, na que visitantes e expositores puideron competir por pezas únicas cun prezo de saída de tan só cinco euros.
A peza máis disputada foi un reloxo de guarnición francés estilo Napoleón III, datado a finais do século XIX, que finalmente se adxudicou por 75 euros. “É un prezo moi inferior ao seu valor real, pero as poxas teñen esta vantaxe para o comprador”, sinalaron desde Memoria Antiga, a Asociación de Anticuarios de Ourense que organiza a feira coa colaboración de Expourense e o apoio da Deputación de Ourense.
Co peche de Antiq Auria, Expourense clausura a súa última feira de novembro. A actividade continuará esta mesma semana co Congreso “Ourense, Territorio Emprendedor 2025”, organizado por AEPA Ourense os días 5 e 6 de decembro. A seguinte gran cita será o VI Congreso Internacional sobre Turismo e Deporte – Sportur Galicia, que se celebrará os días 11 e 12 de decembro, dando inicio á tempada de pista de atletismo no recinto feiral.