A II Gala do Trail Running Galego reuniu no Teatro Principal de Ourense aos principais protagonistas do trail running galego en 2025.
O acto, patrocinado pola Deputación de Ourense, serviu para recoñecer os mellores resultados deportivos do ano e ás probas máis destacadas do calendario.
A II Gala do Trail Running Galego premia aos mellores de 2025
O evento contou coa presenza do presidente da Federación Galega de Atletismo (FGA), Iván Sanmartín, acompañado pola directora territorial da Consellería de Presidencia da Xunta de Galicia, Beatriz Fernández; o asesor técnico de Deportes da Deputación de Ourense, Kike Álvarez; o concelleiro de Deportes de Ourense, Aníbal Pereira; a directora do Teatro Principal, Olga Mojón; así como representantes da marca Lurbel. O presidente da Deputación, Luis Menor, excusou a súa asistencia por motivos de axenda.
Balance deportivo dun ano histórico
Iván Sanmartín abriu a gala cun discurso de benvida no que destacou o alto nivel acadado polos deportistas galegos ao longo de 2025. Durante o acto repasáronse as medallas conseguidas nos campionatos de España, tanto a nivel individual como por seleccións, salientando especialmente os dous títulos de Elpidio Gómez e o triunfo de Raquel Estévez en Canfranc.
Premios por categorías
Ao longo da noite entregáronse os galardóns ás tres primeiras e primeiros clasificados do ranking en cada modalidade:
- Vertical mulleres: Tamara García, Lucía Peón, Raquel Estévez
- Vertical homes: Fico Losada, Elpidio Gómez, Hugo García
- Preclassic mulleres: Julia Salvado, Lucía Taboada, Emma Méndez
- Preclassic homes: Eloy Martínez, Adrián Sesar, Roi Mourón
- Classic mulleres: María Martínez, Tamara García, Rosa Araujo
- Classic homes: Fico Losada, Marcos Pascual, Alexandre Otero
- Maratón mulleres: Charo Figueroa, Carolina Miño, María Martínez
- Maratón homes: Moncho Muiños, Xenxo Laso, José Santiago
- Ultra mulleres: Tamara García
- Ultra homes: Xenxo Laso, José Santiago, Yago Breijo
Tamén se recoñeceron os líderes das distintas categorías de idade, desde Sub16 ata Máster-75.
Premios principais da noite
Por decisión dun xurado especializado, os premios principais recaeron en Elpidio Gómez (ADAS CUPA) e Tamara García (CD Biosbardo), proclamados como mellores atletas galegos de trail running de 2025. O galardón á mellor proba do ano foi para o Trail das Bestas, celebrado en Muras.
Recoñecementos especiais
A gala incluíu tamén premios a aspectos organizativos e ambientais:
- Mellor protección medioambiental: Trail da Baña
- Mellor integración no medio natural: Trail Coba da Bruxa
- Mellor comunicación: Trail Terras de Burón
- Mellor seguridade: Trail de Lousame
- Mellor fotografía: equipo fotográfico do Trail Coba da Bruxa
- Mellor xurado: Campionato de Galicia Ultra en Chantada
- Mellor speaker: Pablo Ríos
Ollada posta en 2026
Na recta final presentouse a axenda do trail running galego para 2026, cun calendario amplo tanto en número de probas como en actividades paralelas. A gala pechouse coa intervención de Beatriz Fernández, que animou a todo o sector a seguir traballando conxuntamente para consolidar o crecemento do trail running en Galicia no vindeiro ano deportivo.