José Manuel Fernández e Francisco Molina, monitores de Nihon Tai-Jitsu e Defensa Persoal dos clubs Ximnasio Estudio A Valenzá, en Barbadás, e Tai-Jitsu Ourense, acadaron o grao de cinto negro 2º DAN en Combate Corpo a Corpo.
Esta titulación da Federación Española de Karate convérteos nos primeiros deportistas da provincia en obter este recoñecemento nesta disciplina.
Dous ourensáns convértense en pioneiros do Combate Corpo a Corpo
O proceso para conseguir esta acreditación desenvolveuse durante as últimas semanas e comezou o pasado 4 de abril en Toledo cun exame de acceso ao curso. Posteriormente, os aspirantes participaron nun programa formativo teórico-práctico centrado nas distintas materias e técnicas incluídas na especialidade.
Unha vez rematada a fase de formación, os candidatos tiveron que superar dúas probas finais, unha teórica e outra práctica, cuxos resultados veñen de facerse públicos. No proceso participaron numerosos aspirantes chegados de diferentes puntos da xeografía española.
A consecución deste novo grao por parte dos dous deportistas ourensáns reforza a presenza de disciplinas especializadas en defensa persoal na provincia e contribúe a elevar o nivel técnico dos clubs Ximnasio Estudio A Valenzá e Tai-Jitsu Ourense.
Segundo destacan desde as entidades deportivas, estas novas titulacións permitirán ampliar e mellorar a formación que ofrecen nos cursos de defensa persoal que imparten habitualmente.