O 60% dos edificios do casco vello de Ourense atópanse en estado ruinoso e corren o risco de perderse se non se actúa con urxencia.
Así o denuncia a portavoz socialista no Concello, Natalia González Benéitez, quen sinala que a decadencia da zona é evidente.
Alerta polo estado ruinoso do centro histórico de Ourense
A situación agrávase pola falta de axilidade na Concellería de Urbanismo, que leva anos sumida no caos. Os socialistas critican a tardanza na tramitación de licenzas e o impacto do desmantelamento da oficina do PERI hai tres anos.
Ademais, acusan ao goberno de Gonzalo Pérez Jácome de carecer de políticas para fomentar a vivenda e o comercio no casco histórico. Actualmente, só un 10% dos locais teñen actividade económica. Segundo o PSdeG, a falta de planificación tamén está poñendo en perigo a Área Rexurbe, que podería perder financiamento por non cumprir cos prazos.
Outra crítica é a delimitación da Área Rexurbe, que deixa fóra o 40% do casco histórico. Aínda así, os socialistas ven nela unha oportunidade se o Concello traballa para aproveitala. «Ourense non pode seguir perdendo oportunidades», conclúe González Benéitez.