O BNG pide no Parlamento de Galicia a reapertura do Complexo de Monterrei que permanece pechado desde fai dous anos para a súa conversión en Parque acuático.
Iago Tabarés, deputado por Ourense, foi o responsable de realizar a petición no Parlamento de Galicia para a reapertura das instalacións de Monterrei.
O BNG pide no Parlamento a reapertura do Complexo de Monterrei
«O 20 de setembro de 2021 a Xunta de Galiza, por medio da Secretaría Xeral para o Deporte daquela directamente dependente da Presidencia do Goberno, formalizou o contrato de obras para a construción da 1ª fase do Parque acuático por un importe de máis de 4,7 millóns de euros, IVE incluído, e cun prazo de execución de 8 meses» indicou Tabarés.
Acompañado polo concelleiro do BNG no Pereiro de Aguiar, Rubén García, Tabarés denunciou que «transcorridos máis de 8 meses dende a formalización do contrato, a Xunta, por desencontros coa adxudicataria, anunciou a resolución do mesmo, así como que as piscinas do Complexo de Monterrei ían estar pechadas durante todo o verán».
Tras resolver o primeiro contrato, a Xunta adxudicou de novo as obras en xaneiro de 2023 cun prazo de execución de 6 meses e un orzamento de 5.676.246,97 € IVE incluído. Este prazo tamén se incumpriu e se sinalou o mes de agosto como data de apertura dunha parte do complexo acuático.
