O PSdeG-PSOE de Ourense ratificou as propostas de candidaturas ao Congreso dos Deputados e ao Senado para as eleccións xerais do 29 de novembro, tras as propostas realizadas polas asembleas locais da provincia.
Tanto o Comité Provincial como a Comisión Executiva Provincial avalaron as listas, que aínda deberán recibir a aprobación definitiva do Comité Federal do partido.
O PSdeG-PSOE de Ourense ratifica as listas para o 29-N
A candidatura socialista ao Congreso está encabezada por Carmen Rodríguez Dacosta, seguida de Brian Diz González, Marina Vaz Quintillán e Brais González Fernández. Como suplentes figuran Sherezade Núñez Rodríguez, Manuel Freire Cid, Rosa Martínez Rodríguez e Luis Fernández Gudiña.
No Senado, a lista está encabezada por María Fernández Ojea, xunto a Rafael Rodríguez Villarino e Lorena Guerra Vigo. As suplencias corresponden a Federico Pérez Mato, Ana Rosa Paradelo Carracedo, Manuel González Iglesias, María Asunción Morgade Rúa, Bruno Antonio Ortiz López e Noa Fernández López.
O secretario provincial do PSdeG-PSOE, Álvaro Vila, asegurou que os socialistas afrontan a convocatoria coa intención de “saír a gañar” e defender unha alternativa baseada no progreso, a igualdade e os intereses da provincia.
Vila reivindicou o balance dos oito anos de Goberno socialista en España, con medidas como a subida do salario mínimo, a revalorización das pensións, o ingreso mínimo vital e o impulso ao transporte público. O dirixente tamén destacou os investimentos en infraestruturas, comunicacións e cultura realizados en Ourense.
O responsable provincial definiu o PSOE como “o único voto útil na provincia para frear un posible goberno da dereita e da ultradereita”. A formación prevé mobilizar a súa militancia e percorrer os concellos ourensáns para presentar o seu balance de xestión e as propostas para afrontar os retos económicos, sociais e demográficos da provincia.