A visita de membros do PSdeG-PSOE de Ourense finalizou con numerosas críticas polo peche do parque acuático de Monterrei (O Pereiro de Aguiar).
No verán de 2022 estaba prevista a finalización da primeira fase do Parque Acuático de Monterrei. Trala renovación da zona deportiva, a inversión na zona de piscinas estaba deseñada en tres fases.
Críticas polo peche do parque acuático de Monterrei
Xa fai uns meses que as obras da primeira fase están paralizadas. O «abandono e parálise total» no que se atopan as obras foi unha crítica unánime dos representantes socialistas. Piden á Xunta de Galicia «solucións urxentes» para unha situación que suporá a ausencia dunhas instalacións de gran demanda en Ourense.
Rafael Rodríguez Villarino, secretario provincial do partido, Carmen Rodríguez, deputada autonómica e Jorge Gutierrez, voceiro socialista no concello de Pereiro acudiron a comprobar o estado das instalacións. «Atopámonos coas instalacións pechadas en pleno verán» sinala Jorge Gutierrez.
Os cálculos sitúan en 70.000 persoas as que cada ano facían uso destas instalacións. Esa cifra é un bo indicador para valorar o que suporá o seu peche.