O barrio do Couto acollerá cinco días de celebracións cunha programación pensada para todos os públicos
Do 15 ao 19 de maio, o barrio do Couto converterase nun dos epicentros festivos da cidade de Ourense coa celebración das tradicionais Festas do Couto 2025, organizadas polo Concello.
As Festas do Couto 2025 encherán de música e espectáculos as rúas de Ourense
O programa inclúe concertos, espectáculos visuais e actividades infantís, destacando o sábado 17 como día central coincidindo coa celebración do Día das Letras Galegas.
As festas comezan o xoves 15 ás 23:00 horas cunha actuación de Combo Dominicano, banda que promete arrancar os primeiros bailes da fin de semana. O venres 16, tamén ás 23:00 horas, será a quenda de Cuarta Calle. Este é un grupo coñecido polas súas versións de grandes éxitos do pop e rock español.
O sábado 17 traerá a programación máis completa e variada. Ás 20:00 h celebrarase un concerto especial de Luar na Lubre, unha das formacións máis recoñecidas da música galega, cunha actuación conmemorativa polo Día das Letras Galegas. Ás 23:30 h está previsto un gran espectáculo de drons, e a noite pecharase cunha sesión de música e luces con Horizon The Show, que se estenderá ata as 3:00 da madrugada.
O domingo 18, ás 20:00 h, a Orquestra Cinema porá o ritmo cunha actuación para todos os públicos. Finalmente, o luns 19, os máis pequenos serán os protagonistas do Día do Neno. As barracas funcionarán a metade de prezo, favorecendo a participación familiar na xornada de peche.