O vindeiro domingo 23 de marzo celebrarase en Celanova a inauguración do Memorial dos 90 de San Breixo.
Este acto será unha homenaxe ás vítimas da represión fascista soterradas no cemiterio parroquial.
Inauguración do Memorial dos 90 de San Breixo en Celanova
Entre agosto de 1936 e agosto de 1943, documentáronse os soterramentos de 90 homes, a maioría asturianos, que foron trasladados a Celanova dende outras prisións.
Moitos destes presos pasaron pola Prisión Central de Celanova, o principal centro represivo da comarca e da provincia de Ourense, activa ata setembro de 1943.
O historiador Domingo Rodríguez Teijeiro identificou a máis de oitenta destes presos. O Comité de Memoria Histórica da Comarca de Celanova ampliou a lista ata 87 despois de consultar expedientes no Arquivo Histórico Provincial de Ourense. Ademais, engadiu tres nomes máis: os irmáns Fuentes Canal, de Ourense, paseados en Celanova en agosto de 1936, e o guerrilleiro monfortino Ramón Yáñez Pereira, asasinado en xullo de 1943.
O memorial conmemora a sete galegos entre as vítimas, incluídos Benito Bello Fernández (Cenlle), Domingo Mantilla González (Sober, veciño de Ribadavia), Enrique Senra Fernández (Arteixo) e Manuel Faría, canteiro portugués veciño de Luíntra.
A cerimonia terá lugar no xardín onde se atopou unha fosa común exhumada en 2022, onde se erguerán dous elementos conmemorativos. Un deles, xa instalado, é unha obra do escultor Baldomero Moreiras. A estrutura de ferro con placas de aceiro inclúe os nomes das vítimas, coroada con siluetas de pombas e situada sobre unha sepultura que simboliza a represión sufrida en Celanova durante toda a ditadura.