A Asociación de Escritoras e Escritores en Lingua Galega (AELG) e a Fundación Curros Enríquez asinaron este 21 de xullo, na Casa dos Poetas de Celanova, un acordo marco de colaboración para impulsar a lingua e a cultura galegas.
O documento foi rubricado polo alcalde de Celanova e presidente da Fundación Curros Enríquez, Antonio Puga Rodríguez, e polo presidente da AELG, Cesáreo Sánchez Iglesias.
A AELG e a Fundación Curros Enríquez unen forzas pola cultura galega
O acordo busca establecer liñas de cooperación para espallar a lingua e a cultura galegas e favorecer o coñecemento e a visibilización da obra dos escritores e escritoras galegos. A iniciativa prestará especial atención aos autores e autoras da área de Celanova.
As dúas entidades desenvolverán actividades conxuntas como conferencias, obradoiros, seminarios, presentacións de libros, itinerarios culturais e rutas literarias, ademais doutros proxectos de interese común.
O acordo tamén establece a creación dunha comisión mixta, que se reunirá periodicamente para planificar, supervisar e avaliar as accións previstas.
Por parte da AELG, formarán parte deste órgano Cesáreo Sánchez Iglesias e Xoán Carlos Domínguez Alberte. A Fundación Curros Enríquez estará representada por Antonio Puga Rodríguez, Antonio Piñeiro Feijóo e Paula Conde Lengua.