O grupo socialista do Concello de Ourense denuncia a inacción e mala xestión do goberno municipal de Democracia Orensana, liderado por Gonzalo Pérez Jácome.
Recentemente, o Tribunal de Contratación Administrativa de Galicia anulase os pregos da concesión do servizo de recollida de lixo e limpeza viaria.
Nova anulación de concesións en Ourense pola mala xestión do goberno
Segundo a edil do PSdeG, María Fernández, esta situación é consecuencia directa das graves irregularidades nos procedementos administrativos do executivo local.
A socialista lembra que Jácome, cando estaba na oposición, criticaba con vehemencia ao anterior goberno por non licitar as concesións caducadas, pero agora evita asumir responsabilidades. «Consideraba que non se podían manter servizos en precario e culpaba ao goberno de turno, pero agora fai exactamente o contrario», afirmou Fernández.
A falta de xestión do actual goberno provoca que servizos esenciais, como o da recollida de lixo, funcionen de maneira deficitaria. Actualmente, a concesión non cobre todos os barrios coa periodicidade necesaria, hai colectores en mal estado e mesmo en situacións insalubres. Ademais, a anómala situación administrativa destes servizos impide que o Concello pague ás concesionarias, xerando unha débeda acumulada que xa supera os 60 millóns de euros.
Os socialistas critican que a falta de vontade política do goberno de Democracia Orensana e o seu descoñecemento sobre o funcionamento da administración pública impiden que se liciten concesións e se aproben orzamentos. «Non queren que a administración funcione como tal, senón como unha empresa privada», denuncian.
Ademais, Fernández acusa ao alcalde de tomar decisións exclusivamente en clave electoral, evitando calquera medida que implique un custo político e hipotecando economicamente o futuro da cidade. «En cinco anos de mandato, non adoptou ningunha decisión política relevante», sostén a edil.
Esta nova anulación engádese á recente suspensión dos pregos do transporte público, que deixa a Ourense sen novas liñas de autobuses ata polo menos 2026. Os socialistas alertan de que a xestión de Jácome está levando ao Concello a unha situación límite, cunha paralización administrativa que prexudica gravemente á cidade e aos seus habitantes.