Lobeira prepárase para vivir a Romaría da Nosa Señora do Viso, unha das citas relixiosas e festivas máis destacadas da Baixa Limia.
Este evento terá lugar os días 22, 23 e 24 de maio de 2026.
Lobeira celebra a Romaría da Nosa Señora do Viso 2026
A programación comeza cunha solemne novena dende o xoves 14 no Templo Parroquial, oficiada polos sacerdotes do Arciprestado.
A xornada do venres 22 abrirá coa Festa da Xuventude, que contará coa animación dunha Disco Mobil Show a partir das 23:00 horas. O sábado 23 concentrará gran parte dos actos tradicionais, iniciando coa baixada da Virxe e a Misa no Santuario ás 18:00 horas.
Un dos momentos máis agardados será a Procesión das Antorchas ás 18:45 horas, que percorrerá o camiño cara ao templo de Lobeira acompañada polos gaiteiros Castrodeallo.
A oferta cultural complétase ese mesmo sábado cunha mostra de produtos típicos e unha degustación gratuíta a partir das 21:00 horas nos stands habilitados. A música será protagonista na verbena coas actuacións da orquestra Costa Dorada, o grupo Los Támega e charangas.
O domingo 24, Festividade de Pentecostes, a actividade trasladarase ao contorno do santuario. Tras a misa das 10:30 horas, a procesión sairá ás 11:30 horas cara ao Viso coa participación de diversos grupos como a Banda de Música de Lobios, a Asociación Cultural Armada e os Bandiños.
A Misa Solemne Campestre das 13:00 horas, cantada pola Coral Camerata Auriense, porá o broche de ouro a este evento que contará tamén coa presenza de artesáns locais.
