O Campionato Galego Sub20 celebrado en Santiago de Compostela deixoulle ao Ourense Atletismo un balance moi positivo, con varias medallas que recoñecen o bo traballo do club, malia non acadar ningún ouro.
A entrega e rendemento dos seus atletas, tanto en categoría masculina como feminina, foron motivo de orgullo para a entidade.
Bo papel do Ourense Atletismo no Galego Sub20
En categoría masculina, Matías Regueiro asinou un bronce nos 3.000 metros obstáculos cun tempo de 10:15.37, mentres que Samuel Banga tamén subiu ao terceiro caixón do podio grazas a un salto de 12.70 metros en triplo salto.
Pola súa parte, Daniel Villanueva acadou a medalla de prata na proba de lanzamento de martelo de 6 kg, cunha marca de 51.24 metros.
Na categoría feminina, Laura Freire conseguiu a prata nos 100 metros lisos cun tempo de 12.75 segundos. A relevista do 4×100 feminino tamén sumaron unha medalla ao palmarés do club, rematando terceiras cun tempo de 52.18 segundos.
Aínda que outras atletas como Olalla García, Noa Rey ou Uxía Rodríguez non lograron subir ao podio, as súas actuacións foron valoradas moi positivamente polo equipo técnico, confirmando a boa saúde deportiva do club.
O Ourense Atletismo continúa así demostrando o seu traballo de base e formación, sendo un dos referentes do atletismo galego en categorías inferiores.