Catro atletas do Sanysec – Ourense Atletismo participaron no Campionato de España Absoluto de atletismo, disputado en Málaga, asinando actuacións destacadas en varias disciplinas.
O mellor resultado chegou da man de Blanca Pereira, que rematou cuarta no lanzamento de martelo cun mellor intento de 58,50 metros, quedando a pouco máis de dous metros do podio, situado nos 60,55 metros.
Blanca Pereira roza o podio no Campionato de España Absoluto
A atleta iniciou o concurso con tres bos lanzamentos (58,50, 57,94 e 57,92), antes de arriscar nas últimas tentativas en busca da medalla.
Pola súa banda, Yiset Magali logrou a segunda posición cun rexistro de 53,62 metros, aínda que non puido optar ás medallas nin acceder á mellora ao non cumprir os requisitos de nacionalidade establecidos na competición.
No salto con pértega, Manuela Blanco finalizou sexta, tras superar 3,61, 3,76 e 3,91 metros ao segundo intento. A atleta non puido franquear posteriormente o listón situado en 4,01 metros.
Finalmente, Iria Solera concluíu na undécima posición no salto de altura. A ourensá superou ao primeiro intento os 1,60 e 1,65 metros, pero non conseguiu superar os 1,70.
O Sanysec – Ourense Atletismo pechou así a súa participación no Campionato de España Absoluto cun balance de catro representantes e varios resultados de relevancia entre a elite do atletismo nacional.