A Comisión Executiva Municipal do PSdeG de Ourense impulsa a creación dun grupo escultórico nos arredores do Arquivo Provincial como homenaxe ás vítimas ourensás da ditadura franquista.
A iniciativa foi anunciada pola secretaria xeral local e voceira no Concello, Natalia González. O anuncio tivo lugar durante o acto de lembranza ao primeiro alcalde socialista da cidade, Manuel Suárez, fusilado o 27 de xullo de 1937.
O PSdeG reclama homenaxe pública ás vítimas ourensás da represión franquista
A proposta inclúe a instalación dun conxunto escultórico cun listado dos nomes das vítimas. Tamén inclúe o cambio de nome da actual praza da Biblioteca Nós pola de Praza da II República, e que se declare todo o espazo como lugar de memoria. O PSdeG presentará a iniciativa ao pleno municipal este venres.
González tamén esixiu ao goberno de Gonzalo Pérez Jácome a constitución do Consello Municipal da Memoria. “Un goberno que da as costas ao seu pasado non pode mirar cara o futuro”, afirmou.
Ao acto asistiu o secretario de Memoria Democrática do PSdeG, Iván Puentes. Este destacou que “o PSOE e o Goberno de Pedro Sánchez son garantes da liberdade e da democracia, especialmente en tempos nos que o avance da ultradereita ameaza as liberdades conquistadas”.
Puentes subliñou que non se pode entender o actual Estado democrático sen o sacrificio dos mártires da II República. “40 anos de ditadura non foron quen de enterrar ese legado” destacou Puentes.
Lembranza de Manuel Suárez e Antonio Taboada
Tamén interveu Miguel Gómez, secretario de Xuventudes Socialistas, que lembrou a figura de Antonio Taboada Nóvoa, fusilado a mesma noite que Suárez con só 29 anos: “Foron baluartes dun soño republicano truncado por un golpe de Estado, non por vontade popular”.
Xosé Lois Carrión, secretario de Memoria Democrática da CEP, repasou a vida e traxectoria de Manuel Suárez. Carrión destacou o seu compromiso político e sindical, e salientou que “traballar na memoria é mirar polo futuro da nosa sociedade”.
Ao acto sumáronse tamén o secretario de Memoria Democrática da CEM, Francisco Javier Quintas; o secretario provincial do PSdeG-PSOE, Álvaro Vila; o secretario de organización de UGT, Daniel Fernández, así como familiares de Manuel Suárez. Todos recordaron con emoción á súa filla. Lolita Suárez, faleceu a finais de 2024 aos 100 anos, tras unha vida de militancia incansable polos ideais do seu pai.