Ribeiro en Común denuncia un grave incumprimento da normativa do PEPRI por parte do goberno municipal de Ribadavia.
A formación asegura que o Concello está a executar obras e reformas en ducias de locais do casco histórico sen contar cos informes técnicos obrigatorios, situación que consideran especialmente preocupante polo avanzado estado dalgunhas intervencións.
Críticas ao goberno de Ribadavia pola xestión das obras do PEPRI
Segundo explican desde o grupo, o goberno local estaría realizando actuacións sen informe da Oficina de Urbanismo, sen informes sectoriais de Patrimonio e sen someter os proxectos á Comisión de Seguimento do PEPRI, órgano no que tamén participa a Xunta.
Para Ribeiro en Común, isto supón un procedemento irregular que podería comprometer as actuacións financiadas pola administración autonómica.
A formación alerta de que esta maneira de proceder pode xerar prexuízos aos veciños e ao propio Concello, especialmente no momento de validar as licenzas de actividade dos locais reformados. “Falamos dun risco real para o futuro destas intervencións por culpa da falta de control e do incumprimento da norma”, subliñan.
Ribeiro en Común vincula ademais esta situación coa contratación por contrato menor dun arquitecto privado, o que interpretan como un intento do goberno do PP de deixar á marxe a Oficina de Urbanismo e a propia Comisión de Seguimento do PEPRI. Lembran que ambas as dúas prazas técnicas figuran na RPT aprobada polo executivo.
O grupo tamén critica que, desde a chegada da maioría absoluta do PP, non se cubrise a baixa da arquitecta municipal, o que consideran unha clara regresión na tramitación de licenzas e no control da disciplina urbanística. Un retroceso que, sinalan, afecta á capacidade de autofinanciamento do Concello a través do ICIO.
Ribeiro en Común acusa ao goberno local de actuar “como se derrogase a norma municipal á carta”, aplicándoa con rigor aos veciños pero incumpríndoa nos seus propios proxectos. A formación advirte de que este comportamento podería derivar en responsabilidades legais se algún particular presenta denuncia.