O PSdeG-PSOE de Ourense celebrou hoxe no Carballiño o seu Comité Provincial, o máximo órgano entre congresos, no que se fixo balance do traballo desenvolvido nos últimos dous meses.
A celebración desta xuntanza na Vila do Orcellón responde ao compromiso da Executiva Provincial de manter reunións ordinarias por toda a provincia desde a súa toma de posesión o pasado mes de maio.
O PSdeG-PSOE de Ourense define a súa estratexia cara ás municipais de 2027
Na sesión, o secretario provincial, Álvaro Vila Araújo, e o secretario de organización, Antonio González Fiuza, detallaron as reunións mantidas recentemente nas diferentes comarcas. Estes encontros permitiron constituír as coordinadoras comarcais e reunir cargos orgánicos e políticos do partido, nun proceso que o PSdeG cualifica como “moi construtivo”.
As e os socialistas destacan que estas citas facilitaron “unha primeira toma de contacto en cada comarca, coñecer a situación política de cada concello e trazar o plan de traballo para os vindeiros meses”. Subliñaron tamén a importancia de percorrer o territorio, escoitar a militancia e reforzar a estrutura local para definir a estratexia “municipio a municipio”.
Durante a súa intervención, Vila Araújo afirmou que o partido xa traballa con horizonte en 2027. Álvaro Vila sinalou que o partido está centrado en construír “as mellores candidaturas posibles”. Tamén fixou como obxectivo buscar persoas que poidan liderar proxectos nos concellos onde actualmente non hai representación socialista. “Somos un partido máis vivo que nunca… e a única opción posible de cambio nunha provincia que precisa rematar coas políticas caciquís e clientelares do PP”, asegurou.
Plan Coperou
O dirixente provincial puxo tamén en valor iniciativas como o Plan Coperou, que definiu como “unha iniciativa socialista que puxo fin á política de cartos a dedo”, permitindo un reparto “xusto e equitativo” dos fondos da Deputación e maiores ingresos municipais.
A Executiva anunciou ademais que nos próximos meses iniciará unha segunda rolda de visitas comarcais. Dixan como obxectivo construír un partido máis forte e arraigado no territorio. O PSdeG marca como prioridade aumentar alcaldías, reforzar maiorías absolutas, recuperar espazos perdidos e entrar con forza en concellos sen representación.
As e os socialistas defenderon o seu proxecto fronte ao modelo do Partido Popular, ao que acusan de “crear desigualdades” e de gobernar con “desleixo e recortes”. “Somos o partido da xente, o que está a carón da veciñanza e reclama servizos públicos dignos e de calidade”, explicaron. Os socialistas reivindicaron un modelo baseado en investimentos equitativos, na escoita activa e na defensa dos recursos dos concellos.