A Subdelegación do Goberno en Ourense incorporou nove novos empregados e empregadas públicas, un reforzo que permitirá mellorar os servizos prestados á cidadanía e avanzar cara unha Administración máis eficaz.
O subdelegado do Goberno, Eladio Santos, deu este luns a benvida ao novo persoal. Santos subliñou que estas incorporacións facilitarán “avanzar cara unha Administración máis eficaz e áxil”.
Nove incorporacións reforzan a Subdelegación do Goberno en Ourense
O representante estatal fixo fincapé en que o reforzo chega nun momento clave para a provincia, especialmente tras a vaga de incendios do último verán.
Neste ámbito, destacou a chegada dun técnico en Protección Civil, que se suma ao funcionario da Aemet incorporado hai uns meses. “Reforzamos a resposta ante emerxencias cun técnico en Protección Civil, que se suma a un funcionario da Axencia Estatal de Meteoroloxía (Aemet) que leva uns meses na Subdelegación. Despois da vaga de lumes que sufriu a provincia, o Goberno de España sabe que este reforzo é máis necesario que nunca”, sinalou Santos.
Outra das áreas que amplía os seus recursos humanos é a unidade de Estranxeiría. Este departamento rexistrou un incremento sostido de actividade nos últimos anos e que agora contará con máis persoal para axilizar trámites e mellorar a atención ao público.
Con estas nove incorporacións, a Subdelegación do Goberno dá un paso máis no seu obxectivo de modernizar a Administración. Tamén reforza áreas prioritarias e garante servizos máis próximos, rápidos e eficaces.