A incorporación de 13 novos axentes á Policía Local de Ourense reforza desde hoxe a seguridade cidadá na cidade.
O alcalde de Gonzalo Pérez Jácome presidiu esta mañá o acto de toma de posesión no salón de plenos do Concello, acompañado polo tenente de alcalde, Aníbal Pereira, e o concelleiro de Seguridade Cidadá, José Ignacio González.
Ourense incorpora 13 novos axentes á Policía Local
Os novos integrantes do corpo municipal —8 homes e 5 mulleres— incorpóranse como funcionarios en prácticas.
A súa chegada amplía a dotación actual da Policía Local de Ourense e responde, segundo o goberno local, á necesidade de incrementar efectivos para mellorar a cobertura nos distintos barrios.
Desde o executivo municipal subliñan que esta promoción supón “dar pasos firmes na mellora dos servizos públicos e da seguridade na cidade”. Engaden que o aumento de persoal policial constitúe unha das demandas históricas de Ourense e permitirá ofrecer unha atención máis próxima e eficiente á veciñanza.
Os axentes iniciarán de inmediato a súa fase de prácticas tuteladas. Durante este período participarán en tarefas de control de tráfico, seguridade cidadá e atención directa á cidadanía, co obxectivo de coñecer a realidade operativa do municipio. A formación concluirá o próximo mes de xullo, momento no que os 13 efectivos pasarán a ser funcionarios de carreira.
O goberno local recalca o seu “compromiso irrenunciable coa seguridade cidadá e a renovación xeracional do corpo da policía”. Con esta ampliación do cadro de persoal, o Concello pretende optimizar os tempos de resposta e reforzar a presenza policial nas rúas da cidade.