O Concello de Ourense pecha o programa tecnolóxico da Molinera tras finalizar os contratos dos informáticos que o desenvolvían nas instalacións deste espazo municipal.
O goberno local continuará empregando os programas e aplicacións creados polo equipo durante o tempo que estivo en marcha a iniciativa.
Ourense finaliza o programa tecnolóxico da Molinera e estuda novos usos para o edificio
O alcalde de Ourense, Gonzalo Pérez Jácome, lamentou a falta de apoio doutras administracións para manter o proxecto. “A Xunta de Galicia e o estado español non quixeron esponsorizar este programa, non achegaron financiamento, e sen axuda non se pode seguir”, afirmou.
O rexedor asegurou que o traballo realizado polos programadores non se perderá. “Moito do software que desenvolveron transferiuse aos servizos informáticos do Concello e seguirase utilizando”, explicou.
En canto ao futuro das instalacións de A Molinera, o Concello estuda licitar o edificio para unha empresa tecnolóxica por un canon duns 10.000 euros mensuais ou trasladar alí dependencias municipais. A decisión tomarase no mes de abril.
