O alcalde de Ourense, Gonzalo Pérez Jácome, acompañado pola concelleira Tamara Silva e o concelleiro Armando Ojea, recibiu esta mañá os 14 nenos e nenas saharauís que pasan o verán na cidade acollidos por familias ourensás dentro do programa Vacacións en Paz.
Durante o encontro, o rexedor deulles a benvida e desexoulles unha feliz estadía en Ourense. “É unha marabilla vervos aquí ano tras ano. Os veráns de Ourense enriquécense con xente coma vós”, afirmou.
Ourense recibe a 14 nenos saharauís do programa Vacacións en Paz
Na recepción tamén participou América López, representante da Solidariedade Galega co Pobo Saharaui (Sogaps), entidade organizadora do programa, xunto coas familias acolledoras. López agradeceu a colaboración municipal e animou outras familias a sumarse á iniciativa.
A representante de Sogaps destacou a importancia destas estadías, que permiten aos menores mellorar a alimentación e realizar revisións médicas, ademais de afastarse durante o verán das condicións extremas dos campamentos de refuxiados de Tinduf.
Os menores proceden dos campamentos saharauís de Tinduf, no suroeste de Alxeria, unha zona desértica na que as temperaturas poden superar os 50 graos durante o verán. O programa Vacacións en Paz facilita así que os nenos e nenas pasen os meses estivais nun contorno máis favorable.
Entre os participantes hai catro menores que visitan Ourense por primeira vez, mentres que outros xa repetiron a experiencia. Tamén forma parte do grupo unha nena que este ano completa a súa última participación no programa.
As familias ourensás manterán aos menores acollidos ata comezos de setembro, cando rematará a súa estadía na cidade antes do regreso aos campamentos de Tinduf.