Avante Ourense reclama ao Concello de Ourense que complete con fondos municipais o refuxio climático da avenida Otero Pedrayo, ao considerar insuficiente a actuación financiada pola Xunta de Galicia, cun investimento de 340.000 euros.
A plataforma considera positivo que a cidade conte co seu primeiro refuxio climático urbano, pero pide estender a intervención ao outro lado da avenida para evitar que quede limitada a unha única parte da vía.
Avante Ourense pide ampliar con fondos municipais o refuxio climático de Otero Pedrayo
«É bastante triste que nunha cidade como Ourense teñamos que conformarnos cun refuxio climático limitado a unha parte da avenida», afirmou o coordinador de Avante Ourense, Francisco Diéguez. Ao seu xuízo, se a Xunta non achega recursos suficientes, «o Concello debe asumir a súa responsabilidade, poñer os fondos necesarios e completar o proxecto».
A formación considera que a adaptación de Ourense ao cambio climático xa é unha necesidade e reclama unha transformación urbana que incremente o arborado, as zonas de sombra, os corredores verdes e os espazos de protección fronte ás altas temperaturas.
Avante Ourense cita as previsións do Atlas de Vulnerabilidade ao Calor do Barcelona Supercomputing Center, segundo as cales Ourense podería pasar dos 21,2 días anuais de calor extremo tomados como referencia no ano 2000 a 58,1 días en 2050.
A plataforma defende que Otero Pedrayo debe ser «só o primeiro paso» cara á creación dunha rede de refuxios climáticos por toda a cidade e reclama maior implicación tanto ao Concello como á Xunta.